1. Tərəflər və müqavilənin bağlanması
1.1. Bu Müəllim müqaviləsi (bundan sonra — «Müqavilə») joinkurs.com platformasının (bundan sonra — «Platforma») operatoru «TRİP AND TECH COMPANY» MMC (VÖEN: 1704160561, ünvan: AZ1023, Bakı şəhəri, Səbail rayonu, Lomonosov, ev 16; bundan sonra — «Operator») ilə Platformada dərs keçmək üçün müraciət edən fiziki şəxs (bundan sonra — «Müəllim») arasında bağlanır.
1.2. Müqavilə ümumi ofertadır (Mülki Məcəllənin 408.7-ci maddəsi). Müəllim müraciət formasının son addımında «Müəllim müqaviləsini oxudum və qəbul edirəm» qutusunu işarələyib müraciəti göndərməklə Müqaviləni qəbul edir. Müqavilə Operator müraciəti təsdiqlədiyi andan qüvvəyə minir. Qəbulun tarixi, vaxtı və Müqavilənin versiyası Platformada qeydə alınır; elektron formada bağlanmış Müqavilə yazılı formaya bərabər tutulur (Mülki Məcəllənin 331.1 və 406.3-cü maddələri).
1.3. İstifadə şərtləri, Məxfilik siyasəti, Geri qaytarma qaydaları və Dərslərin qeydə alınması qaydaları Müəllimə də şamil olunur. Onlarla bu Müqavilə arasında ziddiyyət olduqda Müəllimlə münasibətlərdə bu Müqavilə tətbiq olunur. İstifadə şərtlərində verilmiş anlayışlar burada eyni mənada işlənir.
1.4. Müəllim təsdiq edir ki:
- 18 yaşına çatıb və tam fəaliyyət qabiliyyətlidir;
- təqdim etdiyi şəxsiyyət, təhsil və təcrübə məlumatları doğrudur;
- öyrədəcəyi fənn üzrə lazımi bilik və bacarığa malikdir;
- uşaqlarla işləməsini qadağan edən məhkəmə qərarı və ya başqa hüquqi məhdudiyyət yoxdur;
- Dərs keçməsinə mane olan başqa müqavilə öhdəliyi (məsələn, işəgötürən qarşısında) yoxdur.
2. Müqavilənin predmeti
2.1. Operator Müəllimə aşağıdakı xidmətləri göstərir:
- Müəllimin profilinin və Kurslarının Platformanın kataloqunda yerləşdirilməsi;
- canlı dərs otağı, Dərslərin qeydə alınması və Dərs qeydlərinin saxlanması;
- cədvəl, yazılma, davamiyyət, tapşırıq, material, elan və yazışma alətləri;
- Tələbələrdən Kurs haqqının Müəllimin adından qəbulu və Müəllimlə hesablaşma;
- Tələbələrə və Valideynlərə bildirişlər və xatırlatmalar;
- dəvət linki və QR kod: Müəllimin öz tələbələrini Platformaya gətirməsi üçün;
- Platformanın öz hesabına yeni Tələbələrin cəlb edilməsi;
- şikayətlərə baxılması və geri qaytarmaların idarə edilməsi.
2.2. Müəllim Platformada Kurslar təklif edir, Dərsləri özü keçirir və Operatora 5-ci bölmədə göstərilən komissiyanı ödəyir.
3. Tərəflərin statusu və ticarət nümayəndəliyi
3.1. Müəllim Dərsləri öz adından, müstəqil şəkildə və öz riski ilə keçirir. Bu Müqavilə əmək müqaviləsi deyil; Müəllim Operatorun işçisi deyil, Operator isə Müəllimin işəgötürəni deyil. Müəllim iş vaxtını, Kurslarının məzmununu, qiymətini və cədvəlini özü müəyyən edir.
3.2. Müqavilə müstəsna deyil: Müəllim başqa yerdə və başqa platformalarda da dərs keçə bilər (8-ci bölmənin məhdudiyyəti istisna olmaqla).
3.3. Tapşırıq. Müəllim Operatora Mülki Məcəllənin 789-cu maddəsinə uyğun olaraq onun ticarət nümayəndəsi kimi aşağıdakıları etməyi tapşırır və bunun üçün səlahiyyət verir:
- Müəllimin dərc etdiyi şərtlərlə (Kursun səhifəsi) Tələbələrlə (Valideynlərlə) Dərslərin keçirilməsinə dair müqavilələri Müəllimin adından və onun hesabına bağlamaq;
- Kurs haqqını Müəllimin adından qəbul etmək;
- Geri qaytarma qaydalarına uyğun olaraq Kurs haqqını Tələbəyə (Valideynə) Müəllimin adından qaytarmaq.
3.4. Operator yalnız Müəllimin nümayəndəsidir və Tələbənin (Valideynin) nümayəndəsi kimi çıxış etmir. Tələbə Kurs haqqını Operatora ödədiyi andan Müəllim qarşısındakı ödəniş öhdəliyini icra etmiş sayılır.
3.5. Dərsin keçirilməsinə dair müqavilənin tərəfi və xidmətin icraçısı Müəllimdir.
4. Müraciət, yoxlama və Kursların dərci
4.1. Müəllim müraciətdə profil məlumatlarını, ixtisaslarını, dərs dillərini, şəxsiyyəti təsdiq edən sənədin surətini, (varsa) sertifikatları və tanıtım videosunu təqdim edir. Ödəniş üçün bank rekvizitlərini Müəllim ilk köçürmədən əvvəl Kabinetdə göstərir; rekvizitlər göstərilənədək köçürmə edilmir.
4.2. Operator müraciətə baxır və onu təsdiqləyir və ya səbəbini göstərməklə rədd edir. Rədd edilmiş müraciəti düzəldib yenidən göndərmək olar. Operator müraciəti təsdiqləməyə borclu deyil.
4.3. Uşaq kursları (18 yaşdan kiçiklər üçün) yalnız şəxsiyyət sənədi Operator tərəfindən yoxlanılmış Müəllim tərəfindən açıla bilər. Şəxsiyyət sənədi dəyişdirildikdə yoxlama yenidən aparılır.
4.4. Hər Kurs dərc edilməzdən əvvəl Operator tərəfindən yoxlanılır. Kursun səhifəsindəki məlumat (proqram, format, dil, yaş aralığı, Dərsin müddəti, cədvəl, qiymət, Sınaq dərsi, qeydə alınma) Tələbəyə təklifdir; Müəllim onun tam və doğru olmasını təmin edir.
4.5. Kursun qiymətini Müəllim müəyyən edir. Aktiv abunəsi olan Tələbələr üçün qiymət artımı yalnız onlara ən azı 30 gün əvvəl bildiriş verildikdən sonra növbəti ödəniş dövründən tətbiq oluna bilər.
4.6. Operator qanuna, bu Müqaviləyə və ya İstifadə şərtlərinə zidd Kursu dərc etməyə, dərcdən çıxara və ya dayandıra bilər.
5. Komissiya
5.1. Operatorun haqqı Tələbənin faktiki ödədiyi Kurs haqqından faizlə hesablanan komissiyadır. Komissiyanın dərəcəsi Tələbənin Kursa hansı yolla gəldiyindən asılıdır:
| Tələbənin mənbəyi | Komissiya (standart dərəcə) |
|---|---|
| Öz tələbəsi — Müəllimin dəvət linki və ya kodu ilə gələn Tələbə | 5% |
| Platforma tələbəsi — kataloq, axtarış, Açıq dərs və ya Platformanın reklamı ilə gələn Tələbə | 20% |
| Platforma tələbəsinin ilk Sınaq dərsi | 0% (haqqın hamısı Müəllimə çatır) |
5.2. Müəllimə tətbiq olunan dəqiq dərəcələr onun Kabinetində («Qazanc» bölməsi) göstərilir. Operator ayrı-ayrı Müəllimlər üçün standartdan aşağı dərəcə müəyyən edə bilər.
5.3. Mənbənin müəyyən edilməsi. Tələbənin mənbəyi yazılış anında müəyyən edilir və sonradan dəyişmir. Tələbə Müəllimin dəvət linkini açdıqdan sonra 30 gün ərzində həmin Müəllimin Kursuna yazılarsa, «öz tələbəsi» sayılır. Mənbə Müəllimin Kabinetində hər Tələbənin yanında göstərilir.
5.4. Komissiyanın dərəcəsi hər ödəniş anında həmin ödənişə yazılır; sonradan dərəcə dəyişsə belə, keçmiş ödənişlərə təsir etmir.
5.5. Endirimlər.
- Müəllimin öz təşəbbüsü ilə verdiyi endirim kodu (Müəllimin hesabına endirim): komissiya Tələbənin faktiki ödədiyi məbləğdən hesablanır, endirim Müəllimin payından çıxılır.
- Operatorun hesabına endirim (Platformanın kampaniyası, «Dostunu dəvət et»): Müəllim endirim olmadığı kimi qazanır; fərqi Operator öz hesabına ödəyir.
5.6. Komissiyadan başqa Operator Müəllimdən qeydiyyat, abunə və ya yerləşdirmə haqqı almır. Ödəniş provayderinin haqqını Operator ödəyir.
5.7. Operator standart komissiya dərəcələrini Müəllimə ən azı 30 gün əvvəl bildiriş göndərməklə dəyişə bilər. Müəllim razı deyilsə, dəyişiklik qüvvəyə minənədək Müqaviləyə 14-cü bölməyə uyğun xitam verə bilər.
6. Hesablaşma və ödənişlər
6.1. Müəllimin payı = Tələbənin ödədiyi məbləğ − komissiya (5.5-ci bəndin qaydaları nəzərə alınmaqla). Hər ödəniş üzrə ümumi məbləğ, komissiya və Müəllimin payı Kabinetdə göstərilir və CSV faylı kimi yüklənə bilər.
6.2. Müəllimin payı ona aşağıdakı yollardan biri ilə çatdırılır:
- bölünmüş ödəniş — Ödəniş provayderi Tələbənin ödənişini qəbul edərkən Müəllimin payını birbaşa Müəllimə yönəldir (texniki imkan olduqda);
- aylıq hesablaşma — təqvim ayı ərzində toplanmış Müəllim payı növbəti ayın 15-dək Müəllimin göstərdiyi bank hesabına köçürülür.
6.3. Hesablaşma dövrü təqvim ayıdır. Dövr bağlandıqda Kabinetdə hesabat yaranır; köçürmə edildikdə Müəllimə bildiriş göndərilir.
6.4. Geri qaytarmalar. Tələbəyə pul qaytarıldıqda Müəllimin həmin ödənişdən aldığı pay geri qaytarılan məbləğə mütənasib azaldılır (Operatorun komissiyası da eyni qaydada azalır). Bu məbləğ Müəllimin növbəti hesablaşmasından tutulur.
6.5. Hesablaşma dövrünün yekunu mənfi olarsa (geri qaytarmalar daxilolmalardan çoxdursa), mənfi qalıq növbəti dövrə keçirilir. Müqaviləyə xitam verildikdə Müəllim mənfi qalığı 30 gün ərzində Operatora ödəyir.
6.6. Operator açıq şikayət və ya bank mübahisəsi (chargeback) olan ödənişə aid Müəllim payının köçürülməsini həmin məsələ üzrə qərar qəbul edilənədək saxlaya bilər.
6.7. Müəllim bank rekvizitlərinin doğruluğuna cavabdehdir. Səhv rekvizit üzündən gecikən və ya geri qayıdan köçürməyə görə Operator məsuliyyət daşımır.
6.8. Müəllim hesabatla razı deyilsə, hesabat yarandıqdan sonra 30 gün ərzində support@joinkurs.com ünvanına etiraz göndərir. Operator etiraza 10 iş günü ərzində baxır.
7. Vergilər
7.1. Müəllim öz gəlirindən vergiləri və məcburi sosial ödənişləri özü hesablayır və ödəyir. Müəllim təsdiq edir ki, haqq müqabilində xidmət göstərmək üçün Vergi Məcəlləsinin tələb etdiyi qaydada vergi uçotuna alınıb (VÖEN) və ya ilk ödənişi almazdan əvvəl alınacaq.
7.2. Müəllim VÖEN-ini Kabinetdə göstərir. VÖEN təqdim edilmədikdə Operator qanunun tələb etdiyi hallarda (Vergi Məcəlləsinin 150.1.7-ci maddəsi) Müəllimə köçürülən məbləğdən vergini və məcburi ödənişləri tutub dövlət büdcəsinə köçürməyə borcludur; bu halda Müəllimə çatan məbləğ müvafiq şəkildə azalır.
7.3. Operator öz komissiyasından yaranan vergiləri özü ödəyir.
7.4. Operator vergi orqanlarının qanuni sorğusu əsasında Müəllimə edilmiş ödənişlər haqqında məlumat verə bilər.
8. Öz tələbələri və Platforma tələbələri
8.1. Öz tələbələri. Müəllimin dəvət linki ilə gətirdiyi Tələbələrlə münasibətlərinə Operator müdaxilə etmir və onları başqa Müəllimlərin Kurslarına yönləndirmək üçün Müəllimin dəvət siyahısından istifadə etmir. Müəllim öz tələbələri ilə Platformadan kənarda da işləməkdə sərbəstdir.
8.2. Platforma tələbələri. Platforma tələbəsini Operator öz vəsaiti və səyi ilə cəlb edib. Buna görə Müəllim həmin Tələbənin Platformada onunla keçdiyi son ödənişli Dərsdən sonra 12 ay ərzində:
- ona Platformadan kənarda ödənişli dərs keçməməyi və ya təklif etməməyi;
- ondan Platformadan kənarda (nağd, karta köçürmə və s.) ödəniş qəbul etməməyi;
- onu ödənişi Platformadan kənara keçirməyə təşviq etməməyi
öhdəsinə götürür.
8.3. 8.2-ci bənd pozulduqda Müəllim Operatora həmin Tələbədən Platformadan kənarda aldığı məbləğin 20%-i həcmində, bu məbləği müəyyən etmək mümkün olmadıqda isə həmin Tələbənin Platformadakı son üç ödəniş ayı üzrə orta aylıq Kurs haqqının üç misli həcmində dəbbə pulu ödəyir. Operator əlavə olaraq 14.3-cü bəndə əsasən Müqaviləyə xitam verə bilər.
8.4. Tələbənin öz təşəbbüsü ilə Platformadan çıxması və Müəllimin bununla bağlı heç bir hərəkət etməməsi 8.2-ci bəndin pozulması deyil.
9. Müəllimin öhdəlikləri
9.1. Dərslərin keçirilməsi. Müəllim:
- Dərsləri elan olunmuş cədvələ uyğun, vaxtında və tam müddətdə keçirir;
- Dərsləri yalnız Platformanın dərs otağında keçirir;
- Kursun səhifəsində elan olunan proqrama, səviyyəyə və dilə əməl edir;
- Dərs üçün lazım olan avadanlığı və sabit internet bağlantısını özü təmin edir.
9.2. Ləğv və dəyişiklik. Müəllim Dərsi keçirə bilməyəcəksə, onu Platformada mümkün qədər tez, bir qayda olaraq ən azı 24 saat əvvəl ləğv edir və ya başqa vaxta keçirir. Ləğv edilmiş Dərsin haqqı Tələbənin seçimi ilə geri qaytarılır və ya Dərs başqa vaxta keçirilir.
9.3. Keçirilməmiş Dərs. Müəllim Dərsi açmayıbsa, Dərs keçirilməmiş sayılır, haqqı Tələbəyə qaytarılır və Müəllimə həmin Dərs üçün pay hesablanmır. Üzrsüz səbəbdən təkrarlanan hallarda Operator 13-cü bölmədəki tədbirləri görə bilər.
9.4. Ünsiyyət. Müəllim Tələbələrin və Valideynlərin mesajlarına ağlabatan müddətdə, bir qayda olaraq 2 iş günü ərzində cavab verir. Tələbələrlə və Valideynlərlə yazışma yalnız Platformada aparılır.
9.5. Davranış. Müəllim İstifadə şərtlərinin 10-cu bölməsindəki davranış qaydalarına əməl edir, Tələbələrə hörmətlə yanaşır, ayrı-seçkiliyə yol vermir.
9.6. Rəylər. Müəllim rəyə cavab yaza bilər, lakin Tələbədən rəyi dəyişməyi və ya silməyi tələb edə, rəy müqabilində güzəşt təklif edə və ya saxta rəy təşkil edə bilməz.
9.7. Məlumatın doğruluğu. Müəllim profilində, sənədlərində və bank rekvizitlərində dəyişiklik olduqda onları Kabinetdə yeniləyir.
9.8. Hesab. Müəllim hesabını başqasına vermir və Dərsləri öz yerinə başqasına keçdirmir.
10. Uşaqlarla iş
10.1. Uşaq kursu keçən Müəllim aşağıdakı qaydalara əməl edir:
- bütün Dərslər qeydə alınır; Müəllim qeydi söndürməyə və ya Dərsi Platformadan kənarda keçirməyə cəhd etmir;
- uşaqla Valideynin iştirakı olmadan şəxsi yazışma aparmır; Kursla bağlı bütün yazışma Valideynlə Platformada aparılır;
- uşaqla Platformadan kənarda (telefon, messencer, sosial şəbəkə) əlaqə qurmur, ondan şəxsi əlaqə məlumatı, şəkil və ya video istəmir;
- uşağın yaşına uyğun olmayan məzmun göstərmir və uşağın ləyaqətini alçaldan rəftara yol vermir;
- Dərsdə kənar şəxslərin iştirakına yol vermir.
10.2. Müəllim uşağa qarşı zorakılıq, laqeydlik və ya başqa təhlükə əlamətləri müşahidə etdikdə bu barədə dərhal Operatora (support@joinkurs.com) məlumat verir. «Uşaq hüquqları haqqında» Qanuna əsasən köməyə ehtiyacı olan uşaq barədə məlumatı olan şəxs bu barədə aidiyyəti dövlət orqanlarına məlumat verməlidir.
10.3. 10.1-ci bəndin pozulması Müqavilənin ağır pozuntusudur və hesabın dərhal dayandırılmasına səbəb olur. Qanun pozuntusu əlamətləri olduqda Operator məlumatı hüquq mühafizə orqanlarına ötürür.
11. Tələbələrin fərdi məlumatları
11.1. Müəllim Platformada Tələbələrin və Valideynlərin fərdi məlumatlarına (ad, davamiyyət, tapşırıqlar, yazışma, Dərs qeydləri) yalnız öz Kurslarını keçmək üçün lazım olan həcmdə giriş əldə edir.
11.2. Müəllim bu məlumatları:
- yalnız Dərslərin keçirilməsi məqsədi ilə istifadə edir;
- məxfi saxlayır, üçüncü şəxslərə vermir və açıq dərc etmir;
- Platformadan kənara köçürmür (Dərs qeydlərini yükləmir, Tələbələrin siyahısını ixrac etmir, ekran şəkli çəkmir);
- Kurs bitdikdən və ya Müqaviləyə xitam verildikdən sonra istifadə etmir.
11.3. Müəllim Tələbələr haqqında Kabinetdə apardığı şəxsi qeydlərdə yalnız tədrislə bağlı məlumat yazır; sağlamlıq, din, ailə vəziyyəti kimi həssas məlumatları qeyd etmir.
11.4. Müəllim bu bölmənin pozulması nəticəsində Tələbələrə, Valideynlərə və ya Operatora dəyən zərərə görə məsuliyyət daşıyır.
12. Müəllimin fərdi məlumatları, Dərs qeydləri və əqli mülkiyyət
12.1. Fərdi məlumatlar. Müəllim Müqaviləni qəbul etməklə fərdi məlumatlarının Məxfilik siyasətində göstərilən qaydada işlənməsinə, o cümlədən şəxsiyyət sənədinin surətinin və digər məlumatlarının Məxfilik siyasətinin 8-ci və 9-cu bölmələrində göstərilən, xarici ölkələrdə yerləşən serverlərdə saxlanmasına («Fərdi məlumatlar haqqında» Qanunun 14.3-cü maddəsi) razılıq verir. Şəxsiyyət sənədinin surətinə yalnız Operatorun səlahiyyətli əməkdaşları baxa bilər; hər baxış qeydə alınır.
12.2. Açıq profil. Müəllimin adı, şəkli, başlığı, tərcümeyi-halı, ixtisasları, dərs dilləri, tanıtım videosu, reytinqi və rəyləri Platformada açıq göstərilir.
12.3. Müəlliflik hüququ. Kursun materialları, təqdimatları və Dərsin məzmunu Müəllimə məxsusdur. Müəllim təsdiq edir ki, istifadə etdiyi materiallar üçüncü şəxslərin hüquqlarını pozmur.
12.4. Lisenziya. Müəllim Operatora aşağıdakı istifadə üsulları üçün qeyri-müstəsna lisenziya verir:
- Dərsi qeydə almaq, Dərs qeydini saxlamaq və onu Dərslərin qeydə alınması qaydalarının 6.1-ci bəndində göstərilən şəxslərə göstərmək;
- Kurs materiallarını Kursa yazılmış Tələbələrə əlçatan etmək;
- Müəllimin adını, şəklini, tanıtım videosunu, Kursların adını, təsvirini və örtük şəklini Platformanın kataloqunda, axtarış sistemlərində, sosial şəbəkələrdə və reklamda Platformanı və Müəllimin Kurslarını tanıtmaq üçün istifadə etmək.
Lisenziyanın ərazisi — bütün dünya (internet); müddəti — Müqavilənin qüvvədə olduğu müddət, Dərs qeydləri və materiallar üçün əlavə olaraq onların saxlama müddəti və Kursa yazılmış Tələbələrin giriş hüququ bitənədək; haqq — ayrıca ödənilmir, Operatorun bu Müqavilə üzrə göstərdiyi xidmətlər və Müəllimin Platforma vasitəsilə əldə etdiyi gəlir lisenziyanın əvəzidir.
12.5. Müəllim tanıtım məqsədli istifadəyə (12.4-cü bəndin üçüncü abzası, kataloqdan kənar) razılığını istənilən vaxt Operatora yazmaqla geri götürə bilər.
12.6. Operator Dərs qeydlərindən Platformanı tanıtmaq üçün, süni intellekt modellərini öyrətmək üçün və ya başqa Müəllimlərin xeyrinə istifadə etmir.
12.7. Platformanın proqram təminatı, dizaynı və ticarət nişanları Operatora məxsusdur. Müəllim Platformanın adından və loqosundan yalnız öz Kurslarını və dəvət linkini tanıtmaq üçün istifadə edə bilər.
13. Məsuliyyət və tədbirlər
13.1. Müəllim Dərsin məzmununa, keyfiyyətinə və vaxtında keçirilməsinə, Kursun səhifəsindəki məlumatın doğruluğuna görə Tələbə (Valideyn) qarşısında məsuliyyət daşıyır.
13.2. Müəllimin Müqaviləni və ya qanunu pozması nəticəsində Operatora qarşı üçüncü şəxslərin tələbi irəli sürülərsə və ya Operator Tələbəyə pul qaytarmalı olarsa, Müəllim Operatorun bununla bağlı sənədlə təsdiqlənən zərərini ödəyir.
13.3. Operator Müəllim qarşısında öz xidmətlərinin lazımi qaydada göstərilməsinə və Müəllimin payının vaxtında köçürülməsinə görə məsuliyyət daşıyır. Operatorun günahı üzündən köçürmə gecikərsə, Operator Müəllimin tələbi ilə gecikdirilmiş məbləğin hər gecikmə günü üçün 0,05%-i, lakin gecikdirilmiş məbləğin 10%-dən çox olmamaqla dəbbə pulu ödəyir.
13.4. Operator Platformanın fasiləsiz işləməsinə və Müəllimə müəyyən sayda Tələbə gətirəcəyinə zəmanət vermir. Platformanın nasazlığı üzündən keçirilə bilməyən Dərs başqa vaxta keçirilir; Operator əldən çıxmış faydanı ödəmir.
13.5. Tərəflər cavabdeh olmadıqları, qabaqcadan görə və qarşısını ala bilmədikləri hallara görə məsuliyyət daşımırlar (Mülki Məcəllənin 448.4-cü maddəsi); belə hal barədə digər tərəfə dərhal xəbər verilir.
13.6. Bu Müqavilənin heç bir müddəası qəsdən və ya kobud ehtiyatsızlıqla vurulmuş zərərə görə məsuliyyəti istisna etmir.
13.7. Müəllim Müqaviləni pozduqda Operator pozuntunun ağırlığına uyğun olaraq: xəbərdarlıq edə, Kursu dərcdən çıxara, yeni yazılışları dayandıra, hesabı müvəqqəti dayandıra və ya 14.3-cü bəndə əsasən Müqaviləyə xitam verə bilər. Tədbir və onun səbəbi barədə Müəllimə bildiriş göndərilir; Müəllim 14 gün ərzində etiraz edə bilər.
14. Müqavilənin müddəti və xitamı
14.1. Müqavilə qeyri-müəyyən müddətə bağlanır.
14.2. Tərəflərdən hər biri digər tərəfə ən azı 30 gün əvvəl yazılı (Platformadakı bildiriş və ya e-poçt) xəbər verməklə Müqaviləyə səbəb göstərmədən xitam verə bilər.
14.3. Operator aşağıdakı hallarda Müqaviləyə dərhal xitam verə bilər:
- 10-cu bölmənin (uşaqlarla iş) pozulması;
- saxta sənəd və ya yanlış şəxsiyyət məlumatı təqdim edilməsi;
- 8.2-ci bəndin (Platforma tələbələri) pozulması;
- Tələbələrin fərdi məlumatlarının və ya Dərs qeydlərinin yayılması;
- üzrsüz səbəbdən təkrarlanan keçirilməmiş Dərslər;
- zorakılıq, təhdid, fırıldaqçılıq və ya başqa qanun pozuntusu.
14.4. Xitam zamanı:
- Müəllim başlanmış Kursları xitam tarixinədək tamamlayır və ya Tələbələrə əvvəlcədən xəbər verir; keçirilməmiş Dərslərin haqqı Tələbələrə qaytarılır;
- Müəllimin Kursları dərcdən çıxarılır, profili kataloqdan götürülür;
- Operator son hesablaşmanı xitamdan sonrakı ayın 15-dək aparır; açıq şikayətlərə aid məbləğlər həmin şikayətlər üzrə qərardan sonra köçürülür;
- Dərs qeydləri Tələbələrin giriş hüququ və saxlama müddəti bitənədək saxlanılır.
14.5. Müqaviləyə xitam verilməsi 6.5 (mənfi qalıq), 8 (Platforma tələbələri), 11 (fərdi məlumatlar) və 13-cü (məsuliyyət) bölmələr üzrə öhdəlikləri ləğv etmir.
15. Müqavilənin dəyişdirilməsi
15.1. Operator Müqaviləni dəyişə bilər. Dəyişikliklər barədə Müəllimə onların qüvvəyə minməsinə ən azı 30 gün qalmış Kabinetdə və e-poçtla bildiriş göndərilir. Qanunun tələbi ilə edilən dəyişikliklər daha qısa müddətdə qüvvəyə minə bilər.
15.2. Müəllim dəyişikliklə razı deyilsə, onun qüvvəyə minməsinədək Müqaviləyə xitam verə bilər. Dəyişiklik qüvvəyə mindikdən sonra Platformada Dərs keçməyə davam edən Müəllim yeni redaksiyanı qəbul etmiş sayılır.
16. Mübahisələrin həlli
16.1. Tərəflər mübahisələri danışıqlar yolu ilə həll etməyə çalışırlar. Yazılı pretenziyaya 10 iş günü ərzində cavab verilir.
16.2. Razılıq əldə olunmadıqda mübahisəyə Azərbaycan Respublikasının qanunvericiliyinə uyğun olaraq Operatorun olduğu yer üzrə məhkəmədə baxılır.
16.3. Müqaviləyə Azərbaycan Respublikasının qanunvericiliyi tətbiq olunur.
17. Yekun müddəalar
17.1. Müqavilə Azərbaycan dilində tərtib olunub. Başqa dillərdəki mətnlər tərcümədir; fərq olduqda Azərbaycan dilindəki mətn üstün tutulur.
17.2. Müqavilənin hər hansı müddəasının etibarsızlığı qalan müddəalara təsir etmir.
17.3. Müəllim Müqavilə üzrə hüquq və vəzifələrini Operatorun yazılı razılığı olmadan başqasına verə bilməz.
17.4. Tərəflər arasında bildirişlər Platformada (Kabinet), Müəllimin hesabına bağlı e-poçtla və Operatorun aşağıdakı ünvanlarına göndərilir.
18. Operatorun rekvizitləri
- Ad: «TRİP AND TECH COMPANY» MMC
- VÖEN: 1704160561
- Hüquqi ünvan: AZ1023, Bakı şəhəri, Səbail rayonu, Lomonosov, ev 16
- E-poçt: support@joinkurs.com
- Telefon: [doldurulacaq]
Sənədlə bağlı sualın var? Bizə yaz